Wageningen uniwersitetinden Alessandro Gatto we Perdýu uniwersitetinden Maksim Çepelew bilelikde 121 ýurtda azyk ýitgisi barada global maglumatlar bazasyny döretdiler. Olar FAO-nyň maglumatlar bazasyny ulanyp, GTAP-FBS-den sebitleriň arasyndaky haryt we hyzmat akymlary, şeýle-de ýerlerden peýdalanyş, suwdan peýdalanyş we bug gazlarynyň zyňyndylary baradaky maglumatlar bilen onuň üstüni ýetirdiler diýip, techno.nv.ua habar berýär.
Gözleg garyp ýurtlarda esasy ýitginiň sowadyş enjamlarynyň ýeterlik däldigi we fermer amallarynyň pes netijeliligi sebäpli önümçilik zynjyrynyň irki tapgyrlarynda ýüze çykýandygyny görkezdi. Ösen ýurtlarda bolsa esasy ýitgiler önümleriň aşa köp öndürilmegi we artykmaç sarp edilmegi sebäpli ýüze çykýar.
2004-nji ýyldan 2014-nji ýyl aralygynda dünýäde azyk ýitgisi 24 göterim ýokarlanyp, ýylda 1,92 milliard tonna ýetdi. Bu dünýä ilatynyň jan başyna 775 kilokaloriýa möçberinde gündelik ýitgä getirýär, şolardan 550 kilokaloriýa Günorta Aziýada we Saharadan günorta çenli Afrika ýurtlarynda ýitýär.
Dünýäniň oba hojalyk ýerleriniň we suw baýlyklarynyň tas 20 göterimi ahyrynda zyňylýan azyk önümleriniň önümçiligi üçin ulanylýar. Netijede, 1,8 milliard tonna CO2-ekwiwalent atmosfera goýberilýär.
Bu netijeler önümçiligiň we sarp edişiň ähli derejelerinde azyk ýitgisini azaltmak üçin çäre görmegiň zerurdygyny nygtaýar. Gözlegçileriň işi “Nature Food” žurnalynda neşir edildi.
