Argentinaly futbolçy Lionel Messi Maýami şäheriniň simwoliki açaryny aldy. Oňa baýragy America Business Forum-daky çykyşyndan soň şäheriň häkimi Frensis Suares gowşurdy diýip, ESPN habar berýär.
“Men siziň şäherimiz, ýurdumyz we tutuş futbol dünýäsi üçin bitiren işleriňiz üçin şu açary gowşurmak isleýärin. Size minnetdar” – diýip, Suares aýtdy.
Muňa jogap hökmünde Messi bu şäherde özüni söýülýän we bagtly duýýandygyny hem-de bu baýragy almagyň uly hormatdygyny belledi.
Messi MLS-iň “Inter Maýami” klubunda 2023-nji ýyldan bäri oýnaýar. Ol toparyň taryhynda iň gowy bombardir boldy – onuň hasabynda 84 oýun, 74 gol we 36 assist bar. Şu möwsümde oýunçy MLS-iň yzygiderli çempionatynyň iň gowy bombardiri hökmünde “Altyn butsy” baýragyny aldy. Ol oktýabrda klub bilen şertnamasyny 2028-nji ýyla çenli uzaltdy.
Öň, Messi Ispaniýanyň “Barselona” (2003-2021) we Fransiýanyň “Pari Sen-Žermen” (2021-2023) klublarynda oýnady. Argentinanyň milli ýygyndysynyň düzüminde 2022-nji ýylda dünýä çempiony boldy, iki gezek Amerikanyň Kubogyny utdy (2021-nji we 2024-nji ýyl) we 2008-nji ýylda Olimpiýa oýunlarynyň altyn medalyny gazandy. Şeýle-de, ol “Altyn topuň” sekiz gezek eýesidir.
