Owganystanyň demirgazygynda 6,3 bal ululykda ýertitreme bolup geçdi. Bu barada Ýewropa-Ortaýer deňzi seýsmologiýa merkezi (EMSC) habar berdi.
Ýerasty sarsgynlar Aşgabat wagty bilen 01:28-de hasaba alyndy. Ýertitremäniň merkezi Balh welaýatynda, Mazari-Şarif şäheriniň golaýynda we Taşkurgan şäherinden dokuz kilometr uzaklykda 28 km çuňlukda ýerleşdi. Sarsgynlar goňşy ýurtlarda hem duýuldy.
Gyzyl Ýarymaýyň (ARCS) Owganystandaky bölümçesiniň deslapky maglumatlaryna görä, tebigy betbagtçylygyň netijesinde azyndan 19 adam heläk boldy, ýene 320 adam şikes aldy. Habarda pidalaryň sanynyň köpelmeginiň mümkindigi bellenilýär.
Sosial ulgamlarda ýerleşdirilen kadrlarda Owganystanyň iň hormatlanýan dini we medeni ýerleriniň biri bolan Mazari-Şarif metjidiniň (Gök metjit) bölekleýin ýumrulandygy görünýär. Ol Balh welaýatynyň paýtagty bolan adybir şäherde ýerleşýär.
