ABŞ-nyň Harby-howa güýçleriniň “Harasat awçylary” hökmünde belli bolan 53-nji meteorologiki gözleg eskadrilýasynyň uçarmanlary gözegçiligiň tutuş taryhynda Atlantikada iň güýçli harasatlaryň biri bolan “Melissa” tupanynyň merkezinden uçdy.
Eskadrilýanyň şturmany, podpolkownik Mark Uiti harasatyň göni “gözünden” wideo düşürdi. Kadrlar ABŞ-nyň Goranmak ministrliginiň DVIDS resmi platformasynda ýerleşdirildi. Wideoda “stadion effekti” diýlip atlandyrylýan seýrek tebigy hadysany görmek bolýar. Ägirt bulut diwary harasadyň merkeziniň daşynda ýokary galýar we ýokarlygyna giňäp, münberleri ýada salýar.
Ekipaž tupany ençeme gezek geçip, Milli harasat merkezi üçin meteo-maglumatlary ýygnady, ýöne güýçli turbulentlik sebäpli missiýany bes etmeli boldy diýip, ABC News habar berýär.
“Melissa” harasaty Saffir-Simpson şkalasy boýunça iň ýokary bäşinji kategoriýa, ýeliň güýji sagatda 295 km çenli ýetdi. 28-nji oktýabrda tupan Ýamaýka, soňra Kuba we Gaitä inip, uly weýrançylyklara we elektrik üpjünçiligi bilen bagly näsazlyklara getirdi.
Associated Press-iň maglumatlaryna görä, betbagtçylygyň netijesinde azyndan 49 adam heläk boldy: 40-ysy – Gaitide, sekizisi – Ýamaýkada, biri – Dominikan Respublikasynda. Gaitide we Dominikanda ýene bir adam dereksiz ýiten diýlip hasaplanýar.
Kubanyň kenaryna “Melissa” üçünji kategoriýanyň harasaty hökmünde golaýlady. 735 müň töweregi adam gaçybatalgada galdy. Häzirki wagtda harasatyň güýji ikinji kategoriýa çenli peseldi. 30-njy oktýabr agşamyna çenli “Melissanyň” Bermud adalaryndan günbatara barmagyna garaşylýar.
