9-njy fewralda Bişkekde ilkinji gezek Central Asian Music Awards aýdym-saz baýraklarynyň gowşurylyş dabarasy bolar.
Dabarada, dürli kategoriýalar boýunça ýeňijileri yglan etmek bilen bir hatarda, Bosson, DJ Feel, Ray Horton, Akcent we meşhur BLUE britan topary ýaly dünýä sahnasynyň meşhur ýyldyzlarynyň çykyş etmegine garaşylýar.
“Gyrgyzystanda şeýle derejeli sazandalara baýrak gowşurylyş dabarasy ilkinji gezek geçirilýär. Ýerine ýetirijileriň gazananlaryny belläp, köpçüligiň ünsüni çekip bileris diýip umyt edýäris. Üstünlikli bolsa, Central Asian Music Awards-y her ýyl geçirilmegi meýilleşdirýäris. Diňe bärde däl, eýsem Gazagystanda we Özbegistanda-da geçireris. Bu meselede Gyrgyzystan birnäçe gezek sebitde we halkara derejesinde hem meşhurlyk gazanan wakalaryň başyny başlaýjy boldy. Çarwadarlaryň Oýunlary muňa mysal bolup biler" – diýip, çäräniň guramaçylarynyň biri Jamilýa Muratowa belläp geçdi.
Central Asian Music Awards-yň gowşurylyş dabarasy 9-njy fewralda Gyrgyzystanyň Milli filarmoniýasynda geçiriler. Çäre 18:30 başlaýar.
