Yssyk-köl döwlet tebigy goraghanasynyň çäginde «Ak Ilbirs» ylmy-gözleg we dikeldiş merkeziniň gurluşyk işleri alnyp barylýar. Bu barada Gyrgyzystanyň Tebigy serişdeler, ekologiýa we tehniki gözegçilik ministrligi mälim etdi.
Kaktus.media neşiriniň habar bermegine görä, bu merkez seýrek duş gelýän hem-de ýitip gitmek howpundaky haýwanlaryň saglygyny dikeltmek, olara weterinariýa kömegini bermek we ylmy-gözleg işlerini geçirmek üçin niýetlenen Merkezi Aziýadaky ilkinji ýöriteleşdirilen toplum bolar.
Meýdany takmynan 1 600 inedördül metr bolan bu merkez Ananýewo obasynda gurulýar. Onuň düzüminde ylmy-gözleg barlaghanasy, dolandyryş binasy, weterinariýa bölümi we ýabany haýwanlary dikeltmek merkezi ýerleşer. Gurluşyk işlerini awgust aýynyň ahyryna çenli tamamlamak meýilleşdirilýär.
Häzirki wagtda gurluşyk bilen bir hatarda, merkezi barlaghana enjamlary bilen üpjün etmek işleri hem alnyp barylýar. Şolaryň hatarynda Milli ylymlar akademiýasy, ministrligiň degişli bölümleri we weterinariýa gulluklary bilen bilelikde tehniki tabşyryk taýýarlanyldy hem-de ekologik monitoring, weterinar anyklaýyş, genetiki gözlegler we bioköpdürliligi gorap saklamagy nazarlaýan maksatnamalary goldamak üçin zerur bolan enjamlaryň sanawy düzüldi.
