Samsung Electronics kompaniýasynyň müdirler geňeşiniň başlygy Li Çže Ýon gymmatly kagyzlar bilen baglanyşykly hilelerde günäkär däl diýlip ykrar edildi. Bu barada “Yonhap” agentligi habar berýär. Samsung Group-yň hakyky ýolbaşçysyna garşy kazyýet işi tas üç ýyl we alty aý dowam etdi.
Günorta Koreýanyň prokuraturasy 2020-nji ýylyň sentýabr aýynda jenap Lini günäkär hasaplady. Ol paýnamalaryň bahalaryny galplaşdyrmakda, hasabat bilen bagly maliýe hilelerinde we 2015-nji ýylda Samsung-yň iki bölümçesiniň – Samsung C&T bilen Cheil Industries-iň arasyndaky şübheli şertnama gatnaşmakda aýyplandy. Aýyplaýanlar Li Çže Ýonyň az çykdajy bilen kompaniýalar toparyna gözegçiligi üpjün etmek üçin birnäçe nädogry ädim ädendigini öňe sürdüler.
Işewür ýalan bazar maglumatlarynyň ýaýradylmagynda, dahylly guramalaryň paýnamalarynyň satyn alynmagynda, Samsung C&T-niň paýnamalarynyň bahasyny peseltmek we Cheil Industries üçin bahalary ýokarlandyrmak maksady bilen şertnamanyň bikanun ýola goýulmagynda aýyplandy. Li Çže Ýon 23,2% paý bilen Cheil Industries-iň iň uly paýdarydy, Samsung C&T bolsa Samsung Group holdinginiň esasy kompaniýasydy.
Duşenbe güni kazyýet biznesi miras almak we oňa gözegçiligi üpjün etmek işinde işewür tarapyndan bikanun hereketleri tapmady. Kazyýet miras almagyň 2015-nji ýylda kompaniýalaryň birleşmeginiň ýeke-täk maksady bolmandygyny, şertnamadan paýdarlaryň maliýe taýdan zyýan çekendigini görkezýän subutnamanyň bolsa ýokdugyny karar etdi.
Şeýle-de, kazyýet birleşmek işinde aýyplanan Samsung-yň öňki işgärlerini hem günäkär däl hasaplady.
