Teýlor Swiftiň “Midnights” albomy “Ýylyň iň gowy albomy” kategoriýasynda “Gremmi” aýdym-saz baýragyna eýe boldy. Los-Anjelesde geçirilen 66-njy baýrak gowşurylyş dabarasy CBS tarapyndan ýaýlyma berildi diýip, gazeta.ru habar berýär.
Swiftden başga-da, bu nominasiýada ýeňiş üçin “World Music Radio” albomy bilen Jon Batist, “Endless Summer Vacation” albomy bilen Maýli Saýrus, “Did You Know That There’s a Tunnel Under Ocean Blvd” albomy bilen Lana Del Reý, “GUTS” albomy bilen Oliwiýa Rodrigo, “The Age Of Pleasure” albomy bilen Žanel Mone, “SOS” albomy bilen aýdymçy SZA we “The Record” albomy bilen Boygenius topary bäsleşdi.
Heýkeli almak bilen Swift täze albomynyň çykjakdygyny mälim etdi.
“Men muşdaklaryma minnetdarlyk bildirip, iki ýyl bäri saklaýan syrymy aýtmak isleýärin. Ol 19-njy aprelde täze albomymyň çykmagyndan we The Tortured Poets Department diýlip atlandyrylmagyndan ybarat” – diýip, ýerine ýetiriji aýtdy.
Swift üçin bu ýeňiş “Ýylyň albomy” nominasiýasynda dördünji ýeňiş boldy we bu rekord görkezijidir. Frenk Sinatranyň, Stiw Uanderiň we Pol Saýmonyň hersiniň hasabynda üç ýeňiş bar.
