Prezident Serdar Berdimuhamedow ýurdumyzyň halkynyň we Hökümetiniň adyndan, şeýle hem hut öz adyndan Onuň Alyjenaby Sultan Ibrahim ibni Almarhum Sultan Iskandara Malaýziýanyň Patyşasy hökmünde tagta geçmegi mynasybetli tüýs ýürekden gutlaglaryny, iň gowy arzuwlaryny iberdi.
Döwlet Baştutany hatynda Türkmenistanyň Malaýziýa bilen syýasy, söwda-ykdysady, medeni-ynsanperwer ugurlar boýunça özara bähbitli hyzmatdaşlygy alyp barýandygyny belläp, ony mundan beýläk-de ösdürmäge taýýardygyny beýan etdi.
Serdar Berdimuhamedow mümkinçilikden peýdalanyp, Patyşa Sultan Ibrahim ibni Almarhum Sultan Iskandara berk jan saglyk, bagtyýarlyk, asylly başlangyçlarynda üstünlikleri arzuw etdi.
Kasam kabul etmek dabarasy çarşenbe güni Kuala-Lumpurda patyşalyk köşgünde geçirildi. Sultan Ibragim döwlet döredileni bäri hasap boýunça 17-nji Patyşa boldy. Ol tagtda Pahang ştatynyň mirasdüşer hökümdary Sultan Abdulla Riýatuddin Al-Mustafanyň ornuna geçdi. Abdullanyň bäş ýyllyk ygtyýarlyklarynyň möhleti 30-njy ýanwarda doldy.
Malaýziýa konstitusion monarhiýa döwletidir. Malaýziýanyň Patyşasy 1963-nji ýylda Malaýziýa Federatiw döwleti döredilende ştatlaryň hukugynda döwletiň düzümine giren ştatlaryň dokuz sany Soltanlaryndan 5 ýyl möhlete saýlanylýar.
