Şu günler Katarda geçirilýän futbol boýunça Aziýanyň Kubogynyň dörtden bir finalyna gatnaşjak jübütleriň ählisi belli boldy. Çarşenbe güni, 31-nji ýanwarda olaryň üstüni Ýaponiýanyň we Eýranyň milli ýygyndylary ýetirdi.
Ýaponiýalylar 1/8 finalda Bahreýniň toparyndan üstün çykdylar. Toparlar Dohadaky “El-Tumama” stadionynda oýnadylar. Ýaponiýanyň milli ýygyndysy 3:1 hasabynda ýeňiş gaznady.
31-nji minutda ýaponiýalylaryň ýarym goragçysy Risu Doan hasaby açdy. 49-njy minutda hüjümçi Takefusa Kubo topara ýene bir gol getirdi. 15 minutdan soň derwezeban Dzion Sudzuki öz derwezesine pökgini geçirdi. Gutarnykly hasaby 72-nji minutda hüjümçi Aýase Ueda kesgitledi.
Eýranyň milli ýygyndysy penalti tapgyrynda Siriýanyň toparyndan üstün çykdy. Oýun Dohadaky “Abdulla bin Halifa” stadionynda geçirildi.
Garşydaşlar 120 minutlyk oýnuň dowamynda has güýçlini saýlap bilmediler – 1:1. Netijede, eýranlylar oýundan soňky penalti tapgyrynda ýeňiş gazandylar.
Eýran 34-nji minutda Tareminiň penaltiden gol girizmegi netijesinde hasaby açdy. 62-nji minutda 11 metrlik urgudan Siriýanyň toparynyň hüjümçisi Omar Hribin hasaby deňledi. Penalti tapgyrynda Eýran 5:3 hasabynda utdy.
1/4 final oýunlary 2-nji we 3-nji fewralda geçiriler.
Anna güni Täjigistan Iordaniýa garşy, Awstraliýa Günorta Koreýa garşy oýnar. Şenbe güni Eýran – Ýaponiýa, Katar – Özbegistan oýunlary geçiriler.
