Türkmenistana Russiýa Federasiýasynyň «Rossiýskiýe železnyýe dorogi» (RŽD) açyk paýdarlar jemgyýetiniň baş direktorynyň orunbasary S.Pawlowyň ýolbaşçylygyndaky wekiliýet sapar bilen geldi. Bu barada türkmen metbugatynda habar berilýär.
Saparynyň çäklerinde Türkmenistan bilen Russiýa Federasiýasynyň arasynda demir ýol ulaglary pudagynda hyzmatdaşlygy ösdürmegiň mümkinçilikleri we bu ugurdaky gatnaşyklary işjeňleşdirmegiň geljekki ugurlary, öňde durýan wezipeler ara alnyp maslahatlaşylýar.
“RŽD-niň” baş direktorynyň orunbasary S.Pawlowyň “Türkmendemirýollary” agentliginiň başlygy A.Atamyradow bilen geçiren duşuşygynda myhman ýurdumyzyň ulag-logistika düzüminiň ösüş tapgyrlary, üstaşyr ulag geçelgeleriniň ýagdaýy, bu ugurda halkara hyzmatdaşlygy işjeňleşdirmek üçin bar bolan mümkinçilikler bilen tanyşdyryldy. Wekiliýetiň ýolbaşçysy Türkmenistanda halkara ähmiýetli ulag ýollaryny peýdalanmak boýunça döredilen şertleriň derejesine ýokary baha berip, munuň halkara gatnaşyklary ösdürmegiň möhüm şertini emele getirýändigini nygtady.
Dostlukly ýurduň wekillerine ýurdumyzyň ilkinji “akylly” şäherine — Arkadag şäherine aýlanyp görmäge hem mümkinçilik döredildi. Arkadag şäheriniň häkimliginde geçirilen duşuşyk netijeli häsiýete eýe bolup, onuň dowamynda häzirki zamanyň nusgalyk şäherinde demir ýol ulaglarynyň mümkinçiliklerini artdyrmagyň uly geljeginiň bardygy bellenildi. Şoňa görä-de, ikitaraplaýyn gatnaşyklaryň häzirki ýagdaýy we ony ösdürmegiň ugurlary babatda pikir alyşmalaryň çäklerinde täze şäherde demir ýol gatnawlaryny ösdürmek bilen baglanyşykly meselelere garaldy.
Soňra myhmanlar “akylly” şäher konsepsiýasy esasynda bina edilen Arkadag şäheriniň gözel ýerlerine baryp gördüler.
