Toyota Ýaponiýada ykjam Sienta miniweniniň Juno ady bilen salonyny üýtgedip bolýan täze wersiýasyny hödürledi. Üçünji oturgyç hatarynyň deregine awtomobilde salony dürli maksatlar bilen üýtgedip gurmaga mümkinçilik berýän modul elementleri ýerleşdirildi.
Alyjylar dört taýýar toplumdan birini alyp biler: dynç alyş, uky, iş ýa-da myhman kabul etmek üçin. Şeýle-de, islege görä bäş aýratyn moduldan interýeri özbaşdak ýygnamak mümkinçiligi bar.
Awtomobil Toyota Yaris-iň TNGA-B platformasyna esaslanýar. Ol gibrid hereketlendirijisi bilen enjamlaşdyryldy we öňdäki hem yzdaky herekete getiriji bilen hödürlenýär.
Salon çyga we yslara durnukly mata bilen örtüldi. Mundan başga-da, interýerde yşyk diodly yşyklandyryş, ýörite halyçalar we Juno nyşany bar.
Sienta Juno-nyň başlangyç bahasy 3,65 mln ýena (takmynan, 24 800 dollar) barabar. Goşmaça mebel üçin ýene 2200 dollar tölemeli bolar.
Model şäher şertlerinde ykjam rahatlyga islegiň artýandygyny görkezýär. Sienta Juno awtomobili diňe bir gezelenç üçin däl, eýsem ýaşamak we işlemek üçin çeýe giňişlik hökmünde ulanmak isleýänler üçin tüýs laýykdyr.
