25-nji ýanwarda Türkmenistanyň Gyrgyzystandaky ilçihanasynda 2024-nji ýylyň Türkmenistanda "Pähim-paýhas ummany Magtymguly Pyragy" ýyly diýlip yglan edilmegi mynasybetli brifing, şeýle hem Prezident Serdar Berdimuhamedowyň "Ýaşlar - Watanyň daýanjy" atly ilkinji kitabynyň tanyşdyrylyşy geçirildi. Bu barada Türkmenistanyň DIM-niň Metbugat gullugy habar berýär.
Çärä Gyrgyzystanyň Ylymlar akademiýasynyň ýanyndaky Ç.Aýtmatow adyndaky Dil we edebiýat institutynyň ýolbaşçylary, Ž.Balasagun adyndaky Gyrgyz milli uniwersitetiniň rektorlygy, Gyrgyzystanyň DIM-niň Diplomatik akademiýasynyň ýolbaşçylygy, öňdebaryjy syýasatşynaslar, žurnalistler, şeýle hem Bişkegiň ýokary okuw mekdeplerinde bilim alýan türkmen talyplary we türkmen kowçumlarynyň wekilleri gatnaşdylar.
Brifingiň barşynda Magtymguly Pyragynyň edebi mirasynyň möhüm ähmiýeti bellenilip geçildi.
Serdar Berdimuhamedowyň kitabynyň aýratyn ähmiýeti barada durlup geçildi.
Çärä gatnaşyjylara şeýle hem türki dünýäsiniň 2024-nji ýyldaky medeni paýtagty - Änew şäheri barada gürrüň berildi, şeýle hem ýurdumyzyň gazananlaryny görkezýän wideoşekiller görkezildi.
