2023-nji ýylda türk kompaniýalary Türkmenistanda umumy bahasy 3,2 milliard dollarlyk 7 taslamanyň durmuşa geçirilmegine gatnaşdylar. Bu barada Türkiýe Respublikasynyň täze ilçisi Ahmet Demirok metbugat maslahatynda habar berdi.
«Öňki ýyllarda başy başlanan taslamalary göz öňünde tutsak, häzirki wagtda türk kompaniýalary tarapyndan umumy bahasy 4,4 milliard dollarlyk 21 taslama durmuşa geçirilýär» diýip, diplomat belledi.
Şeýle hem ol türk kompaniýalarynyň Arkadag «akylly» şäheriniň ikinji tapgyrynyň gurluşygyna gyzyklanma bildirýändikleri barada aýtdy.
Türkiýäniň ilçisiniň beren maglumatlaryna görä, Türkmenistan Garaşsyzlygyna eýe bolanyndan bäri türk kompaniýalary Türkmenistanda umumy bahasy 50 milliard dollardan gowrak bolan 1080-e golaý taslamany üstünlikli durmuşa geçirdiler.
