Ýaponiýaly ýazyjy Rie Kudan 2024-nji ýylda abraýly Akutagawa edebiýat baýragyna eýe bolan romanynyň bir böleginiň generatiw emeli aňyň kömegi bilen ýazylandygyny boýun aldy. TASS-yň habaryna görä, bu barada ol Tokioda geçirilen metbugat ýygnagynda habar berdi.
Ol sýužeti AI bilen aýrylmaz baglanyşykly bolan “Tokyo-to Dojo-to” (ýaponçadan - “Tokionyň duýgudaşlyk diňi”) romany üçin Akutagawa baýragyna eýe boldy. Eseriň mazmunynyň esasynda uzak bolmadyk geljegiň Tokiosynda ýaşaýan zenan binagäriň durmuş hekaýaty durýar. Ol jenaýatçylaryň rahatlykda saklanýan belent diňiniň taslamasyny taýýarlady.
Rie Kudan: "Käwagt başga biri bilen paýlaşyp bilmejek aladalarym bilen emeli aňa ýüz tutýaryn. Bu kitaby ýazanymda ChatGPT ýaly generatiw AI-den köp peýdalandym. Kitabyň, takmynan, bäş göterimi AI tarapyndan döredilen sözlemlerden ybarat diýsemem boljak. AI-ni netijeli ulanmak arkaly, başarnygymy ýüze çykarmaga mümkinçilik berýän romanlar ýazmagy dowam etdirmek isleýärin " - diýdi.
Ýapon edebiýatynyň nusgawy ýazyjysy Ryunoske Akutagawanyň baýragy 1935-nji ýylda döredildi. Ol dürli ýyllarda Kobo Abe we edebiýat boýunça Nobel baýragynyň eýesi Kenzaburo Oe ýaly meşhur ýapon ýazyjylaryna gowşuryldy.
