20 ýyldan gowrak öň sport karýerasyny tamamlan 29 ýaşly ýapon çapuw aty "Haru Urara" 26-njy iýunda çykan Uma Musume Pretty Derbi mobil oýnundaky gahrymanyň prototipi boldy. Bu bir wagtlar yhlaslylygyň nyşanyna öwrülen haýwana täzeden gyzyklanma döretdi diýip, UPI ýazýar.
Haru Urara 113 ýaryşa gatnaşyp, olaryň hiç birinde ýeňiş gazanyp bilmändi. Şeýle-de bolsa, çydamlylygy we tanalýan keşbi bilen Ýaponiýada giňden meşhurlyk gazandy - ol ýaryşlara gülgüne esbaply çykýardy we Hello Kitty-niň nikabyny geýýärdi. Şowsuzlyklaryna garamazdan, özüni çydamlylygyň we optimizmiň nyşany hasaplaýan janköýerleri gazanmagy başardy.
Uma Musume Pretty Derby oýnunda gahrymanlar ýaryşlara gatnaşýan atlaryň gulaklary we guýruklary dakylan gyzlar hökmünde suratlandyrylýar. Haru Urara atly gahrymanyň toslanyp tapylan terjimehaly onuň şadyýanlygyny we boýun synmazaklygyny nygtaýar: "Ol hernäçe utulsa-da, barybir hemişe ýylgyrýar. Elmydama elinden gelenini edýär we geljege ynam bilen garaýar".
Resmi janköýerler klubynyň agzasy Haru Uraranyň fewral aýynda doglan gününi bellän mahaly diadema geýen suratyny internetde ýerleşdirenden soň, atyň meşhurlygy ýene-de artdy. Bu surat sosial ulgamlarda giňden ýaýrady.
