Portugaliýaly hünärmen Žoze Mourinýo Saud Arabystanynyň «Al-Şabab» futbol toparyna ýolbaşçylyk etmäge razy boldy diýip, RIA Nowosti «Aawsat» neşirine salgylanyp habar berýär.
Mourinýonyň soňky iş ýeri Italiýanyň «Roma» topary bolupdy. Ol 16-njy ýanwarda topary terk etdi. 2021/22-nji möwsümde portugaliýaly hünärmen topar bilen Konferensiýalar ligasynda ýeňiş gazanyp, rimlileri ilkinji Ýewropa kubogyna tarap alyp bardy. 2022/23-nji möwsümde Mourinýonyň ýolbaşçylygyndaky «Roma» Ýewropa ligasynyň finalyna çykdy we penalti tapgyrynda Ispaniýanyň «Sewilýa» toparyndan utuldy.
Neşiriň habaryna görä, Mourinýo «Al-Şabab» toparynyň sport direktory Dominiko Tite bilen wideo aragatnaşyk arkaly gepleşik geçirdi. Saud Arabystanyň Professional ligasynyň işgärleri saýlamak boýunça komitetiniň portugaliýalynyň toparyň baş tälimçisi wezipesine bellenmegini eýýäm tassyklandygy habar berildi. Mourinýonyň topar bilen şertnamasynyň şertlerini gutarnykly ylalaşmak üçin ýakyn günlerde Er-Riýada gelmegine garaşylýar.
Ozal, Mourinýo Angliýanyň «Mançester Ýunaýted», «Çelsi» we «Tottenhem» toparlaryna, Madridiň «Realyna», Italiýanyň «Inter» toparyna, Portugaliýanyň «Portu», «Leýriýa», «Benfika» toparlaryna tälim berdi. Tälimçi hökmünde Çempionlar ligasynyň we Ýewropa ligasynyň (öňki UEFA kubogy) ýeňijisi boldy.
