Türkmen halkynyň Milli Lideri Gurbanguly Berdimuhamedow Arkadag şäheriniň döwrebap ýaşaýyş jaýlaryna ilaty göçürip getirmek işinde säwliklere ýol berilýändigi üçin Arkadag şäheriniň häkimi Ş.Durdylyýewiň işine nägilelik bildirdi.
“Watan” habarlar gepleşiginde habar berlişi ýaly, 20-nji ýanwarda Gurbanguly Berdimuhamedow Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazowyň we Arkadag şäheriniň häkimi Ş.Durdylyýewiň gatnaşmagynda Arkadag şäherinde iş maslahatyny geçirdi.
Maslahatyň barşynda Arkadag şäheriniň häkimi Ş.Durdylyýew täze şähere ilaty göçürip getirmek boýunça alnyp barylýan işler, şeýle hem täze şäherde söwda we hyzmatlar ulgamynyň işiniň ýola goýluşy barada hasabat berdi.
Gurbanguly Berdimuhamedow ýaşaýyş jaýlaryna ilatyň göçürilmegi bilen baglanyşykly meselelere örän jogapkärçilikli we hemmetaraplaýyn esasda çemeleşilmelidigini belledi. Halkymyzyň bagtyýar durmuşyň hözirini görüp ýaşamaklary ugrunda ähli zerur tagallalar edilmelidir. Şunda söwdanyň medeniýetini ýokarlandyrmak, hyzmatlar ulgamynda bökdençlikleriň ýüze çykmagynyň öňüni almak häzirki döwrüň möhüm wezipesi hökmünde kesgitlenendir.
Gurbanguly Berdimuhamedow Ş.Durdylyýewe ýüzlenip, ýol berlen säwlikleri gysga wagtda düzetmek we Arkadag şäheriniň hemmetaraplaýyn sazlaşykly ösüşi bilen baglanyşykly meseleleri yzygiderli gözegçilikde saklamak babatda birnäçe anyk görkezmeleri berdi.
