20-nji ýanwarda Türkmenistanyň Halk Maslahatynyň Başlygy Gurbanguly Berdimuhamedow Arkadag şäherine amala aşyran iş saparynyň çäklerinde täze şäheriň ikinji tapgyrynda gurulmagy meýilleşdirilýän binalaryň şekil taslamalary, käbir desgalaryň bezeg işleri, şeýle hem düzümleýin desgalaryň ýerleşjek ýerleriň çyzgylary bilen tanyşdy.
Türkmen halkynyň Milli Liderine görkezilen taslamalaryň hatarynda Oba hojalyk uniwersitetiniň binalar toplumynyň, senagat ugurly desgalaryň, muzeýiň, Saglyk öýüniň, Ýangyna garşy göreş gullugy binasynyň, “Saglyk” seýilgähiniň teklip edilýän şekil taslamalary bar. Şeýle hem bu ýerde Arkadag şäheriniň Baş metjidiniň içki bezeg aýratynlyklaryna, lukmançylyk edaralarynyň klasterine degişli nyşanlaryň görnüşlerine degişli taslamalar görkezildi.
Gurbanguly Berdimuhamedow görkezilýän şekil taslamalar bilen tanşyp, Oba hojalyk uniwersitetiniň binalar toplumynyň taslamalaryna birnäçe belliklerini aýtdy we olara degişli düzedişleri girizdi. Täze şäheriň gurluşygynyň ikinji tapgyrynda ýaýbaňlandyrylan işler yzygiderli gözegçilikde saklanylmalydyr.
Häzirki döwrüň ösen tehnologiýalaryň zamanasydygyny nazara alanyňda, ähli ugurlarda bolşy ýaly, gurluşyk maksatnamasynyň amala aşyrylmagynda täzeçil tehnologiýalaryň, dünýäniň ösen tejribesiniň we sanly ulgamyň netijeli ulanylmalydygyny belläp, türkmen halkynyň Milli Lideri bu ugurda öňünde durýan wezipeleriň üstünlikli ýerine ýetirilmegine örän jogapkärçilikli çemeleşilmelidigini belledi.
Arkadag şäheriniň gurluşygynyň ikinji tapgyrynyň önümçilik kuwwatlyklaryna niýetlenen güwanamalaryň, önümçiligiň söwda nyşanlarynyň döwrebap derejede taýýarlanylmagyna jogapkärçilikli we häzirki zamanyň talaby esasynda çemeleşilmelidigini belläp, Gurbanguly Berdimuhamedow bu ugurda häzirki zamanyň täzeçil ýörelgeleriniň işjeň ulanylmalydygyna ünsi çekdi.
