20-nji ýanwarda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Arkadag şäheriniň täze Athana toplumyna bardy.
“Watan” habarlar gepleşiginde habar berlişi ýaly, bu ýerde Gurbanguly Berdimuhamedow täze şäheriň ikinji tapgyrynda gurulmagy meýilleşdirilýän binalaryň şekil taslamalary, käbir desgalaryň bezeg işleri, şeýle hem düzümleýin desgalaryň ýerleşjek ýerleriň çyzgylary bilen tanyşdy. Türkmen halkynyň Milli Lideri täze athana toplumynda idedilýän bedewleriň ýagdaýlary bilen gyzyklandy.
“Türkmen alabaý itleri” assosiasiýasynyň hem-de “Halkara ahalteke atçylyk assosiasiýasynyň” wise-prezidenti B.Rejebow 600 orunlyk athana toplumynda atşynaslaryň öndürijilikli işlemekleri we bu ýerde atçylyga degişli ylmy işleri alyp barmak ugrunda döwlet tarapyndan zerur tagallalaryň edilýändigi üçin hoşallyk bildirdi.
Gurbanguly Berdimuhamedow täze toplumyň mümkinçilikleri bilen tanyşlygyň dowamynda bu ýerde milli atşynaslyk däplerini ösdürmek, ony dünýä derejesine çykarmak ugrunda ähli zerur şertleriň döredilendigini belläp, atşynaslygyň milli ýörelgeleriniň häzirki zamanyň ösen tejribesi bilen utgaşdyrylmagy babatda özüniň maslahatlaryny we öwüt-ündewlerini berdi. Bu ugurda alnyp barylýan işleriň innowasion usulda ýerine ýetirilmegi özüniň oňyn netijesini berer. Şunda bu ýerde döredilen ýokary derejeli mümkinçilikler netijeli peýdalanylmalydyr.
