Gresiýanyň häkimiýetleri şu ýyl syýahatçylardan howa salgydyny ýygnap başlar, ol häzirki myhmanhana salgydynyň ornuny tutup, ýokary möwsümde – mart aýyndan oktýabr aralygynda hereket eder. Bu barada respublikanyň hökümet neşirine salgylanyp, Interfax habar berýär.
“Şu ýyl Gresiýa syýahatçylar üçin täze salgyt girizdi. Ol “howa çökgünligine durnuklylyk üçin töleg” diýlip atlandyryldy we ol häzirki myhmanhana salgydynyň ornuny tutar. Täze sistema boýunça ol mart aýyndan oktýabr aýy aralygynda ýaşamak üçin ýerleşilýän obýektlerde ýygnalar. Häkimiýetler bu salgydyň tebigy betbagtçylyklarda kömek etmek üçin gowy maliýe goldawy boljakdygyna bil baglaýarlar” – diýlip, habarda aýdylýar.
Bellenilişi ýaly, salgyt mukdary myhmanhananyň kategoriýasyna görä üýtgär.
Mysal üçin, birýyldyzly ýa-da ikiýyldyzly myhmanhanalarda bir gije üçin goşmaça 1,5 ýewro tölemeli bolar, öň salgyt 0,5 ýewrody. Üçýyldyzly myhmanhanada salgyt bir günde 3 ýewro bolar (öň, 1,5 ýewro), dörtýyldyzly myhmanhanada bolsa 3 ýewro däl-de, 7 ýewro tölemeli bolar. Bäşýyldyzly myhmanhanalarda günde goşmaça 10 ýewro tölemeli bolar (öň, 5 ýewro).
Neşiriň belleýşi ýaly, howa salgydy ýerleşýän ýeriň bahasyna goşulmaýar, ony ýerinde tölemeli.
Şol bir wagtyň özünde, syýahatçylyk salgydy pes möwsümde hem saklanýar. Ol noýabr aýyndan fewral aýy aralygynda bir gün üçin 0,5 – 4 ýewro bolar.
