16-njy ýanwarda Türkmenistanyň Azerbaýjan Respublikasyndaky ilçihanasynyň binasynda Türkmenistanda 2024-nji ýylyň “Pähim-paýhas ummany Magtymguly Pyragy” ýyly diýlip yglan edilmegi mynasybetli maslahat geçirildi. Onda beýik akyldar şahyryň umumadamzat ähmiýetli döredijiligi, doglan gününiň 300 ýyllygynyň halkara derejesinde dabaraly belleniljekdigi we çärelere ýurdumyzda alnyp barylýan taýýarlyk işleri barada belläp geçdiler. Bu barada ýurdumyzyň daşary syýasat edarasy habar berdi.
Şeýle hem, Türkmenistanyň Hormatly Prezidenti Serdar Berdimuhamedowyň “Ýaşlar – Watanyň daýanjy” atly ilkinji kitabynyň tanyşdyrylyş dabarasy boldy. Bu kitabyň ýaş nesilleri watansöýüji, ylymly-bilimli, giň dünýägaraýyşly terbiýeläp ýetişdirmekde uly ähmiýete eýedigini we Döwlet baştutanymyzyň ýolbaşçylygynda ýurdumyzyň geljegi bolan ýaşlara ähli şertleriň we mümkinçilikleriň döredilýändigi barada nygtap geçdiler.
Ýokarda agzalan çärelere Azerbaýjanyň milli Ylymlar akademiýasynyň hem-de bu Akademiýanyň Nizami Genjewi adyndaky edebiýat institutynyň professor-alymlary, magtymgulyşynaslar we Azerbaýjanda bilim alýan türkmen talyplary gatnaşdylar.
Dabaraly çäre Türkmenistanyň Oguzhan adyndaky “Türkmenfilm” birleşiginiň Magtymguly Pyragy barada Azerbaýjanda surata düşürilen “Hakyň guly - Magtymguly” atly dokumental filmi görkezilmegi bilen tamamlandy.
