Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Mary welaýatyna iş saparynyň çäklerinde Murgap etrabynyň “Maldar” maldarçylyk hojalygynyň öri meýdanlaryna bardy. Bu barada Türkmenistan Halkara habarlar merkezi habar berýär.
Bu ýerde dowar yzynda gezýän kärendeçi çopan M.Ataýew özüniň ogly hem-de agtygy bilen Gurbanguly Berdimuhamedowy garşyladylar. Türkmen halkynyň Milli Lideri ykbalyny asylly işe baglan çopan bilen hal-ahwal soraşdy, olaryň alyp barýan işleri, dowarlaryň ýagdaýy bilen gyzyklandy.
M.Ataýew bakýan sürüsinde 550-den gowrak dowaryň bardygyny, olaryň dok we talabalaýyk gyşladylýandygyny belledi.
Kärendeçi çopan özüniň 25 ýyldan bäri çopançylyk edýändigini, her ýylda dowarlardan sagdyn owlak-guzulary alýandygyny we şeýlelik bilen, maşgalanyň girdejileriniň artýandygyny uly buýsanç bilen aýtdy.
Maldarçylygyň milli ýörelgeleriniň bardygyna ünsi çekip, Gurbanguly Berdimuhamedow sähra ýerlerinde düýe malyna aýratyn gadyr goýulýandygyny, onuň ýüňüniň, etiniň, süýdüniň, çalynyň we agaranynyň ynsan saglygy üçin tenekardygyny belledi.
Kärendeçi çopan M.Ataýew çopan goşuna gelip, hal-ahwal soraşandygy, çopançylyk işi bilen gyzyklanandygy üçin Gurbanguly Berdimuhamedowa tüýs ýürekden hoşallyk bildirdi, Ataýewiň agtygy bolsa Gurbanguly Berdimuhamedowyň “Pähim-paýhas ummany Magtymguly Pyragy” atly goşgusyny okap berdi.
