8-nji ýanwarda Türkiýe Respublikasynyň Türkmenistanda täze bellenen Adatdan daşary we Doly ygtyýarly ilçisi Ahmet Demirok Prezident Serdar Berdimuhamedowa ynanç hatyny gowşurdy.
Duşuşygyň dowamynda taraplar ýurtlarymyzyň arasyndaky döwletara gatnaşyklaryň hemişe özara hormat goýmak we birek-birege goldaw bermek ýörelgeleri esasynda ýola goýulýandygyny, halkara syýasatynyň özara gyzyklanma bildirilýän meseleleri boýunça, aýratyn hem dünýäde parahatçylygy we howpsuzlygy üpjün etmek, Durnukly ösüş maksatlaryna ýetmek bilen bagly garaýyşlaryň bolsa meňzeşdigini ýa-da gabat gelýändigini kanagatlanma bilen bellediler.
Türkiýe Türkmenistanyň söwda-ykdysady gatnaşyklary alyp barýan iň möhüm ýurtlarynyň biridir. Söhbetdeşler bu ugurda gatnaşyklary has-da ösdürmek üçin uly mümkinçilikleriň bardygyna ünsi çekip, şunda Ykdysady hyzmatdaşlyk boýunça Hökümetara türkmen-türk toparyna we Işewürlik geňeşine uly ornuň degişlidigini bellediler.
Türkmen hünärmenleriniň we ýaşlarynyň Türkiýede bilim almagy hem-de tejribe okuwlaryna gatnaşmagy ýurdumyzyň bilim ulgamynyň kämilleşmegine ýardam edýär.
Ýurtlarymyzyň arasynda syýasy-diplomatik, söwda-ykdysady we medeni-ynsanperwer ulgamlarda ýola goýlan gatnaşyklary mundan beýläk-de ösdürmek üçin oňaýly mümkinçilikleriň bardygyna hem-de bu gatnaşyklaryň geljekde has-da pugtalandyryljakdygyna berk ynanýaryn diýip, döwlet Baştutany aýtdy.
