2023-nji ýyl Fransiýada gözegçiligiň taryhynda iň yssy ýyllaryň sanawynda ikinji boldy. Bu barada Meteo France meteorologiýa gullugyna salgylanyp, TASS habar berýär.
“Selsiý boýunça 14,4 gradus ortaça temperatura bilen 2023-nji ýyl Fransiýada 2022-nji ýyldan soň ikinji iň yssy ýyl boldy. Ortaça ýyllyk temperatura 1991-2020-nji ýyllaryň howa kadasyndan 1,4 gradus ýokary boldy” – diýlip, hasabatda aýdylýar.
Reýtingde birinji orny 2022-nji ýyl eýeleýär, bu ýylda Fransiýada ortaça temperatura 14,5 gradus boldy.
Ýeri gelende ýatlap geçsek, Ýewropanyň howany öwrenmek boýunça Copernicus programmasynyň maglumatlaryna görä, 2023-nji ýyl dünýäde iň yssy ýyl boldy.
Şeýle-de, meteorologlar Fransiýanyň dürli sebitlerinde ygal derejesinde düýpli tapawudyň bardygyny belleýärler. Eger tutuş ýurt boýunça ygal kadaly derejede bolan bolsa, ýurduň demirgazygyndaky Pa-de-Kale departamentinde 15-nji oktýabrdan 4-nji ýanwar aralygynda 500 mm-den gowrak ygal düşdi, bu bolsa adatdakysyndan iki esse ýokarydyr, käbir ýerlerde ygal derejesi 800 mm-den geçdi. Demirgazyk Alplarda we O-de-Frans demirgazyk sebitinde-de ygal güýçli boldy. Munuň tersine, Langedok we Russilon sebitlerinde, şeýle-de Korsika adasynda birnäçe ýyl bäri ygal ýetmezçiligi hasaba alynýar.
