5-nji ýanwarda Magtymguly adyndaky Türkmen döwlet uniwersitetinde ýurdumyzyň bilim, ylym, saglygy goraýyş, sport ulgamlarynyň we jemgyýetçilik guramalarynyň guramagynda Türkmenistanyň Prezidentiniň «Ýaşlar — Watanyň daýanjy» atly kitabynyň tanyşdyrylyş dabarasy geçirildi. Bu barada uniwersitetiň resmi saýtynda habar berilýär.
Dabara ýurdumyzyň bilim, ylym, saglygy goraýyş, sport we jemgyýetçilik guramalarynyň wekilleri, mugallymlardyr talyplar, köp sanly ýaşlar gatnaşdylar.
Dabaranyň başynda Türkmen döwlet medeniýet institutynyň talyplarynyň taýýarlan edebi-sazly kompozisiýasy görkezildi.
Türkmenistanyň Prezidenti Serdar Berdimuhamedowyň bu kitaby ýaşlar bilen baglanyşykly döwlet syýasatynyň esasy ugurlaryny, bu babatda öňde durýan möhüm wezipeleri amala aşyrmakda maslahatdyr pikirlerini, tejribelerini öz içine alýar. Täze eser ýurdumyzyň ylym, bilim, saglygy goraýyş, sport ulgamlarynyň we jemgyýetçilik guramalarynyň işini ösdürmekde, kämilleşdirmekde, ýaşlary belent watansöýüjilik ruhunda terbiýelemekde gymmatly gollanmadyr. Tanyşdyrylyş dabarasynda hem bu boýunça çykyşlara giň orun berildi.
