Microsoft korporasiýasy Surface markaly noutbuklaryny we planşetlerini täzelemäge taýýarlanýar. Enjamlar emeli aň (AI) funksiýalaryny goldaýan nerw prosessorlarynyň täze nesli bilen enjamlaşdyrylar diýip, Windows Central portalynyň baş redaktory Zak Bouden çeşmelere salgylanyp habar berdi. Onuň sözlerine görä, Surface Pro 10 we Surface Laptop 6 ARM arhitekturasy ýa-da Intel prosessorlarynyň 14-nji nesli esasynda Qualcomm Snapdragon X çipleri bilen üpjün ediler.
Surface - Microsoft tarapyndan işlenip düzülen enjamlaryň tapgyry. Onuň ilkinji önümi 2012-nji ýylda dünýä bazaryna çykdy.
Täze enjamlar 2024-nji ýylyň ýazynda Microsoft-yň emeli aňly kompýuterleriniň ilkinji nesli hökmünde hödürlener. Qualcomm çiplerine esaslanýan enjamlar Cadmus adyny alar diýen çaklama bar. Bu tehnika Hudson Valley diýlip atlandyrylýan Windows operasiýa ulgamynyň täze wersiýasy üçin ýörite işlenip düzüldi.
