Türkmenistanyň Bilim ministrligi Bilim edaralarynda elektron okuwy we uzak aralykly bilim tehnologiýalaryny ulanmak arkaly bilim maksatnamalaryny durmuşa geçirmegiň Tertibini tassyklady.
Degişli hukuk resminamasy 2023-nji ýylyň 23-nji dekabrynda Türkmenistanyň Adalat ministrligi tarapyndan döwlet belligine alyndy.
Bu Tertip hünär-tehniki bilim, orta hünär bilimi, ýokary hünär bilimi, ýokary okuw mekdebinden soňky hünär bilimini amala aşyrýan, işgärleriň hünär derejesini ýokarlandyrýan we olary gaýtadan taýýarlaýan, okuwçylaryň mekdepden daşary we goşmaça bilim edaralary we bilim işini amala aşyrýan beýleki edaralar tarapyndan elektron okuwy we uzak aralykly bilim tehnologiýalary ulanylyp geçirilýän bilim maksatnamalaryny durmuşa geçirmegiň tertibini düzgünleşdirýär.
Resminamada bellenilişi ýaly, «Umumy bilim edarasy, bilim işine gatnaşýanlaryň erkine bagly bolmadyk ýagdaýlaryň döremegi bilen baglylykda, okaýanlaryň we pedagogik işgärleriň özara gatnaşyklaryna esaslanýan tehnologiýalary doly möçberde ulanmak mümkinçiliginiň bolmadyk halatynda, bilim maksatnamalaryny elektron okuwy we uzak aralykly bilim tehnologiýalaryny peýdalanmak arkaly durmuşa geçirip biler».
Elektron okuwy we uzak aralykly bilim tehnologiýalarynyň çäklerinde geçirilýän okuw sapaklary okuw otaglarynda (synp otaglarynda) geçirilýän okuw sapaklar, şeýle hem özbaşdak işler üçin hem deňdir.
Bilim edarasynda elektron okuwy we (ýa-da) uzak aralykly bilim tehnologiýalaryny ulanmak arkaly okatmaga başlamak üçin aşakdakylaryň bolmagy hökmany şertdir:
1) her bir bilim maksatnamasy boýunça okuw meýilnamalarynyň dersleriniň (tapgyrlaryň, modullaryň, okuwlaryň) okuw maksatnamalarynyň ählisi boýunça elektron okuw-usulyýet toplumlarynyň;
2) elektron kitaphananyň;
3) maglumat-kommunikasiýa tehnologiýalarynyň;
4) maglumat-telekommunikasiýa torlarynyň;
5) beýleki tehniki we tehnologik serişdeleriň.
Bilim edaralarynda elektron okuwy we uzak aralykly bilim tehnologiýalaryny ulanmak arkaly bilim maksatnamalaryny durmuşa geçirmegiň Tertibiniň doly görnüşi bilen şu salgydan tanşyp bilersiňiz.
