2025-nji ýylyň oktýabr aýynda Newada ştatynyň (ABŞ) ýaşaýjylary Mid kölüniň golaýynda eşidilen näbelli güýçli güňleç sesler sebäpli howsala düşdüler. Las-Wegasyň 39 kilometr gündogarynda, Kolorado derýasynyň üstünde ýerleşýän bu uly suw howdanynyň töweregindäki kanýonlarda adaty bolmadyk güýçli we depginli sesleriň ýaňlanýandygy aýdyldy. Daily Mail neşiriniň maglumatyna görä, ýerli polisiýa ýaşaýjylardan onlarça arz-şikaýat kabul edipdir, sosial ulgamlarda bolsa bu sesler barada köp sanly wideo peýda bolandygyny görmek bolýar.
Hadysa şaýat bolanlaryň gürrüňleri dürli-dürlüdir. Käbirleri bu sesleri äpet demir gapynyň uzakdan gelýän jygyldysyna meňzedýärler. Başgalar bolsa ony gaz turbasyndan çykýan güwwüldä çalymdaş diýip belleýärler.
Bir ýaşaýjynyň ýazmagyna görä: «Ses şeýle bir güýçli boldy welin, penjireler lerzana gelip, titreme müňlerçe metr aralyga ýaýrady». Ýene biri bu sesleriň depginli ýagdaýda, belli bir ýygylykda çykýandygyny aýdyp, munuň adam tarapyndan döredilýän enjama meňzeýändigini nygtaýar.
Ýerli hünärmenler birnäçe tebigy düşündirişleri öňe sürýärler. Olardan, kanýonlaryň arasynda güýçli ýeliň emele getirýän ýanyk sesi, ownuk ýer yranmalary, Guwer bendinden ýa-da golaýdaky gurluşyk meýdançalaryndan geçýän sandyramalar bar.
Şeýle sesler Mid kölüniň töwereginde ozal hem birnäçe gezek bellige alnypdy. 2010-njy ýyllarda kölüň suw derejesiniň peselmeginden soň şeýle habarlar ýygy-ýygydan peýda bolup başlady. 2022-nji ýylda suwuň rekord derejede peselmegi bilen syýahatçylar demriň gaty jygyldysyny we ýerastyndan ýaly eşidilýän çuňňur güňleç sesleri has gowy saýgaryp başladylar.
Şol bir wagtyň özünde, konspirologiýa nazaryýetçileri başgaça pikir öňe sürýärler. Olar bu sesleriň çeşmesiniň “51-nji Zolak” diýlip atlandyrylýan meşhur harby territoriýanyň golaýyndaky ýerasty desgalara baglanyşykly bolmagy mümkin diýip çaklaýarlar. Bu baza 1950-nji ýyllardan bäri gizlin harby taslamalar we daşky älem seresaplyklary bilen baglanyşykly gürrüňleriň merkezinde. Käbirleri bolsa şol ýerde “ýakyn geljekde bolup biljek wakalara taýýarlyk üçin” ýerasty şäher gurulýandyr öýdýärler.
