TÜRKSOÝ halkara guramasynyň başlangyjy bilen Daşkentde Türki dünýäsiniň kinematograflarynyň birleşigi (Assosiasiýa) döredildi. Guramaçylyk ýygnagyna türki dilli ýurtlaryň kino pudagynyň ýolbaşçylary gatnaşdy diýip, Trend habar berýär.
Bu assosiasiýa türki dünýäsiniň kino sungatyny janlandyrmak, bilelikdäki kino taslamalaryny döretmek, bilelikdäki täze filmleri öndürmek, şeýle-de iň gowy filmleri halkara arenasyna çykarmak, türki dilli döwletleriň filmleri üçin bir umumy kinoprokat ulgamyny döretmek maksady bilen döredildi.
Ileri tutulýan ugurlaryň biri Daşkent halkara kinofestiwalynyň we “Gorkut-Ata” halkara kinofestiwalynyň derejelerini dünýä ülňülerine ýetirmekdir.
Geljekde türki halklaryň bilelikdäki kino taslamalary üçin platforma bolup hyzmat etjek Türki dünýäsiniň kinoakademiýasyny döretmek meýilleşdirilýär.
