«Apple» kompaniýasy «Apple Vision Pro» giňeldilen hakykat äýnekleriniň önümçiligini artdyrdy we ony 2024-nji ýylyň fewral aýynda tanyşdyrmaga taýýarlanýar. Bu barada «Bloomberg» agentligi habar berýär.
Täze enjamyň önümçiligi Hytaýdaky zawodlarda güýçli depginde alnyp barylýar we birnäçe hepde bäri dowam edýär. Çeşmeleriň berýän habaryna görä, hyzmatdaşlar üçin niýetlenen enjamlaryň 2024-nji ýylyň ýanwar aýynyň ahyryna çenli taýyn bolmagy maksat edinilýär, bölekleýin satuwa bolsa indiki aýda çykarmak meýilleşdirilýär.
Çarşenbe güni «Apple» programma üpjünçiligini işläp düzüjilere elektron hat iberdi we ykjam programmalaryny iň täze işläp taýýarlama gurallary arkaly synap, «Vision Pro-nyň» çykmagyna «taýyn» bolmaga çagyrdy. Bu onuň ýakyn wagtda tanyşdyryljakdygynyň ýene bir subutnamasydyr.
«Bloomberg-iň» habaryna görä, «Apple» uzakmöhletleýin täze satuw strategiýalaryny talap edýän iň kyn önüm çykarylyşy bilen ýüzbe-ýüz bolýar. Enjam satuw nokadynda ýygnalmaly we gaplanmaly aýratyn böleklerden ybaratdyr. Mundan başga-da, «Vision Pro» ulanyjynyň kellesinde dogry berkidilmedik bolsa, enjam kontenti dogry görkezmez we örän agyr işleýän ýaly duýlup bilner.
