Gyrgyz parlamentiniň agzalary respublikanyň Döwlet baýdagynyň dizaýnyny bölekleýin üýtgetmek baradaky teklibi goldady. Bu barada TASS habar berýär.
59 deputat ikinji we üçünji okalyşda Döwlet baýdagynyň dizaýnyny üýtgetmek üçin ses berdiler, bäşisi garşy çykdy. Ozal kanunyň taslamasy Gyrgyzystanyň mejlisiniň degişli komiteti tarapyndan goldanyldy.
Döwlet baýdagynyň dizaýnyny şu ýylyň güýzünde üýtgetmek baradaky başlangyç bilen Mejlisiň başlygy Nurlanbek Şakiýew çykyş etdi. Dekabr aýynyň ortalarynda ýurduň prezidenti Sadyr Žaparow spikere baýdagy çalyşmagy hut özüniň teklip edendigini aýtdy. "Ondan öň jemgyýet arasynda baýdagymyzyň günebakara meňzeýändigi barada işjeň pikirler bardy. Bize syýahat etmäge gelen daşary ýurtlularyň, megerem, biziň ýurdumyzda günebakar köp ekilýändir diýýänleri hem boldy" – diýip, Gyrgyz döwletiniň baştutany Kabar döwlet habarlar gullugyna beren interwýusynda düşündirdi.
Gyrgyz Respublikasynyň baýdagy gyzyl reňkli gönüburçly matanyň merkezinde ak öýüň tüýnügi şekillendirilip, ondan tolkun şekilli 40 sany sary Gün şöhlesi dürli tarapa uzalyp gidýär. Döwlet baýdagynyň täze wersiýasynda bu şöhleler göni görnüşde.
