Türkmenistanyň Gahrymany, Roskosmos-yň kosmonawtlar toparynyň serkerdesi, TASS-nyň Halkara kosmos stansiýasyndaky (ISS) ýörite habarçysy Oleg Kononenko kosmonawt Ýuriý Malençenkodan öňe geçip, kosmos uçuşlarynyň jemi dowamlylygy boýunça ikinji ýeri eýeledi. Bu barada Roskosmos habar berdi.
“Şu gün Halkara kosmos stansiýasynda bir ýyllap dowam edýän ekspedisiýa gatnaşýan Roskosmos-yň kosmonawty Oleg Kononenko kosmos uçuşlarynyň jemi dowamlylygy boýunça dünýäde üçünji orundan ikinji orna çykdy. Ol kosmosa 6 gezek uçuşynda jemi 827 gün 9 sagat 23 minut 19 sekunt jemlän watandaşy Ýuriý Malençenkodan öňe geçdi"- diýip habarda aýdylýar.
Roskosmos umumy dowamlylygy 878 gün 11 sagat 29 minut 48 sekunt bolan bäş uçuşy tamamlan Gennadiý Padalkanyň kosmosda bolan umumy wagty boýunça birinji ýerde durýandygyny belläp geçdi. 4-nji fewralda irden Kononenkonyň bu rekordy täzelemegine garaşylýar.
Kosmonawt sentýabr aýynda "Soýuz MS-24" kosmiki gämisinde HKS-e bardy we stansiýada bir ýyl bolmagy göz öňünde tutulýar. Bu ekspedisiýanyň çäginde Kononenko kosmosda 1 müň günden gowrak wagt geçiren ilkinji adam bolup biler diýlip çaklanylýar.
