Şu gün, 2-nji dekabrda Gamburgdaky Elba filarmoniýasynda 2024-nji ýylyň futbol boýunça Ýewropa çempionatynyň toparlaýyn tapgyrynyň bije çekişligi geçiriler. Ýaryş 14-nji iýundan 14-nji iýul aralygynda geçirilip, oňa 24 topar gatnaşar.
Bije çekilşik Aşgabat wagty bilen 22:00-da başlar. Häzirki wagtda Ýewropa çempionatynyň final tapgyryna 21 gatnaşyjy belli. 20 topar saýlama tapgyryndan üstünlikli geçdi, Germaniýanyň topary bolsa kabul ediji ýurt hökmünde göni ýollama aldy. Ýaryşlaryň hojaýynlary, adatça, bije çekişigiň birinji sebedinde birinji orny eýeleýärler. Şeýle-de, birinji sebede Portugaliýanyň, Fransiýanyň, Ispaniýanyň, Belgiýanyň we Angliýanyň toparlary girdi. Ikinji sebede Wengriýanyň, Türkiýäniň, Rumyniýanyň, Daniýanyň, Albaniýanyň we Awstriýanyň, üçünji sebede Niderlandlaryň, Şotlandiýanyň, Horwatiýanyň, Sloweniýanyň, Slowakiýanyň we Çehiýanyň toparlary girdi. Dördünji sebet häzirlikçe Italiýanyň, Serbiýanyň we Şweýsariýanyň toparlaryndan ybarat. Oňa heniz pley-off oýunlarynyň üç ýeňijisi-de goşular.
Ýewro-2024-de oýnamaga hukuk gazanmak üçin pley-off-a 12 topar gatnaşýar, Ýewropa çempionaty üçin üç ýollama ugrunda göreşilýär. Toparlar üç ugra bölünýär (A, B, C derejeleri), olaryň her birinde ýarym final we final oýunlary oýnalar. Her ugruň ýeňijileri Ýewropa çempionatyna çykýarlar. Pley-off-yň jübütleri toparlaryň Milletler ligasyndaky reýtingine esaslanýar. A derejesiniň birinji ýarym finalynda Uels Finlýandiýany kabul eder, ikinjide Polşa Estoniýa bilen oýnar. B derejesinde ýarym final oýunlarynda Bosniýa we Gersegowina Ukrainany, Ysraýyl bolsa Islandiýa bilen duşuşar. C derejesinde ýarym finallarda Gruziýa – Lýuksemburg we Gresiýa – Gazagystan oýunlary geçiriler. Ýarym final duşuşyklary 21-nji martda, final oýunlary 26-njy martda bolar.
Ýewro çempionatynyň final böleginde toparlar alty toparça bölüner (her toparçada her sebetden bir topar). Ýaryşyň pley-off-yna 16 topar çykar: alty toparçanyň ýeňijisi, öz kwartetlerinde ikinji orny eýelejek alty topar, şeýle-de toparlaýyn ýaryşy üçünji orunlarda tamamlanlaryň arasynda iň gowy dört topar.
