Iki ýaşly amerikaly Isla Maknabb (Kentukki ştaty) Ginnesiň rekordlar kitabyna girizildi. Gyzjagaz aň derejesi ýokary bolan adamlaryň jemgyýetiniň iň ýaş agzasy boldy diýip, MIR 24 habar berýär.
Islanyň kakasynyň aýtmagyna görä, çagajyk ýedi aýlyk wagty kitaplarda özüne aýdylan predmetleri görkezip bilýärdi, 18 aýlyk wagty elipbiýi öwrendi, iki ýaşynda bolsa okamaga başlady. Mundan başga-da, ol ähli sanlary we reňkleriň aglabasyny bilýär.
Çaganyň ene-atasy gyzjagaza IQ derejesi ýokary bolan adamlaryň jemgyýetine goşulmak isleýänler üçin synagdan geçmek gerek diýen karara geldiler. Ilkibaşda hünärmenler gyzjagazyň örän ýaşdygy üçin synagy geçirmekden boýun gaçyrdylar, ýöne ahyrynda razy boldular.
Häzir Isla üç ýaşynda. Ol çagalar bagyna gatnaýar. Isla matematikany, surak çekmegi we okamagy gowy görýär. Gyzjagazyň ene-atasy onuň üçin aýratyn bilim meýilnamasynyň düzülmegini we mekdebe ir gitmegine mümkinçilik berilmegini isleýär.
