Türkmen döwlet binagärlik-gurluşyk institutynda Russiýanyň D.I.Mendeleýew adyndaky himiýa-tehnologiýa uniwersitetiniň “Informatika we kompýuter taslamalary” kafedrasynyň dosenti Filipp Sergeýewiç Sowetin bilen onlaýn duşuşyk geçirildi. Bu barada “Türkmenistan: Altyn asyr” habar berýär.
Moskwanyň Mendeleýew uniwersitetiniň hünärmeni türkmen ýokary okuw mekdebiniň talyplary bilen “Himiki-tehnologiki prosesleri modelirlemek” dersi boýunça okuw sapagyny geçdi. Himiýa tehnologiýasy fakultetiniň organiki däl maddalaryň himiki tehnologiýasy hünäri boýunça okaýan talyplar “Himiýa pudagynda awtomatlaşdyrylan taslama ulgamy (ATU)” temasyndan leksiýa diňlediler.
Şeýle-de, Türkmen döwlet binagärlik-gurluşyk institutynda Türkmenistanyň ýokary okuw mekdepleriniň we hünärment mekdepleriniň wekilleriniň Berliniň Boýt adyndaky Amaly ylymlar tehniki uniwersitetiniň professory Boris Reznik bilen duşuşygy guraldy.
Duşuşyk Türkmen döwlet binagärlik-gurluşyk institutynyň, Ý.Kakaýew adyndaky Halkara nebit we gaz uniwersitetiniň, S.A.Nyýazow adyndaky Türkmen oba hojalyk uniwersitetiniň, Türkmen Oba hojalyk institutynyň, Türkmenistanyň Inžener-tehniki we ulag kommunikasiýalary institutynyň, Türkmenistanyň Döwlet energetika institutynyň, şeýle-de Türkmenistanyň Gurluşyk we binagärlik ministrliginiň Aşgabat gurluşyk orta hünär okuw mekdebiniň we Aşgabat şäheriniň “Türkmendemirýollary” agentliginiň demirýol ulaglary orta hünär okuw mekdebiniň mugallymlarynyň we talyplarynyň gatnaşmagynda onlaýn görnüşde geçirildi.
Berlin uniwersitetiniň “Geodeziýa we geoinformatika” kafedrasynyň professory diňleýjiler üçin “Emeli intellekti ulanmak arkaly inženerçilik desgalaryna gözegçilik” temasyndan leksiýa okady.
