Minskde ylym we tehnologiýa pudagyndaky hyzmatdaşlyk boýunça Hökümetara türkmen-belarus toparynyň III mejlisi geçirildi. Bu barada Belarusyň Türkmenistandaky ilçihanasyna salgylanyp, Türkmenistan Halkara Habarlar portaly habar berýär.
Bu çärede Türkmenistanyň wekiliýetine türkmen tarapdan toparyň egindeş başlygy bolan Türkmenistanyň Ylymlar akademiýasynyň prezidenti Allaberdi Aşyrow ýolbaşçylyk etdi.
Belarus tarapyna Belarus Respublikasynyň ylym we tehnologiýa boýunça Döwlet komitetiniň başlygynyň orunbasary Tatýana Stolýarowanyň ýolbaşçylygyndaky respublikanyň ylmy-gözleg guramalarynyň hünärmenleri wekilçilik etdi.
Mejlisiň dowamynda ylmy-tehniki hyzmatdaşlygyň Türkmenistan bilen Belarusyň arasyndaky hyzmatdaşlyk gatnaşyklarynyň möhüm bölegidigi bellenildi.
Taraplar özara bähbitli esasda ylmy-tehniki hyzmatdaşlygy mundan beýläk-de güýçlendirmek barada ylalaşdylar. Ylmy bilimler we tejribeler bilen alyşmagy işjeňleşdirmek, bilelikdäki taslama işlerini giňeltmek, şeýle-de umumy ylmy-gözleg guramalaryny we ýokary tehnologiýaly kärhanalary döretmek üçin tagalla etmek kararyna gelindi.
Gepleşikleriň dowamynda taraplar 2024-2025-nji ýyllar üçin ylmy-tehniki hyzmatdaşlygyň ileri tutulýan ugurlaryny kesgitlediler. Olara täze himiki tehnologiýalary we materiallary işläp taýýarlamak, bio- we nanotehnologiýa pudagynda gözlegler, lukmançylyk we farmasewtika pudagynda bilelikdäki taslamalar, ekologiýa meselelerini çözmek, tebigy we tehnogen seýsmiki hadysalary öwrenmek hem-de oba hojalygyna innowasion tehnologiýalary ornaşdyrmak degişlidir.
