Dünýä reýtinginiň lideri serbiýaly Nowak Jokowiç Professional tennisçileriň assosiasiýasynyň (ATP) Jemleýji ýaryşynyň final oýnunda italiýaly Ýannik Sinneri utdy. Report agentliginiň habar berşi ýaly, ýaryş Italiýanyň Turin şäherinde geçirildi.
Duşuşyk Jokowiçiň peýdasyna 6:3, 6:3 hasabynda tamamlandy. Toparlaýyn tapgyrda Sinner Jokowiçi 7:5, 6:7 (5:7), 7:6 (7:2) hasabynda utdy.
Serbiýaly tennisçi häzirki möwsümde ýedinji tituly gazanyp, bu görkeziji boýunça ýeke-täk lider boldy. Ol 2023-nji ýylda alty ýaryşda ýeňiji bolan dünýäniň ikinji raketkasy ispaniýaly Karlos Alkarasdan öňe geçdi.
Jokowiç ýedinji gezek ATP-niň Jemleýji ýaryşyny utdy we bu görkeziji boýunça ýaryşlaryň rekord eýesi boldy. Öň, ol 2008, 2012, 2013, 2014, 2015, 2022-nji ýyllardaky ýaryşlarda ýeňiş gazandy. Mundan öň rekord ýaryşyň alty gezek ýeňijisi bolan şweýsariýaly Rojer Federere degişlidi (2003, 2004, 2006, 2007, 2010, 2011).
