Häzirki günde Türkmenistanda internet ulanyjylaryň umumy sany 3 149 178 adama ýetdi. Şolardan 421 609 müşderi simli internet ulanyjylary, 2 727 569 müşderi bolsa ykjam Internet ulanyjylarydyr diýip, “Türkmenaragatnaşyk” agentliginiň başlygy Hajymyrat Hudaýgulyýew “TurkmenTel – 2023” halkara ylmy maslahatynda eden çykyşynda habar berdi. Muny “Türkmenistan: Altyn asyr” ýetirýär.
Şeýle-de, Hudaýgulyýew Türkmenistanda 8 sany döwletara optika süýümli maglumat geçiriş ugrunyň gurnalandygyny belledi.
“Balkan welaýatynyň Garabogaz şäheriniň serhet birikmesinden Gazagystanyň Teýmir baba ilatly nokadyna, Balkan welaýatynyň Etrek sebitine we Eýran Yslam Respublikasynyň Kümmet-Kowus şäherine çenli optika süýümli aragatnaşyk ulgamyny gurmak meýilleşdirilýär. Türkmenistanyň we Azerbaýjan Respublikasynyň aragatnaşyk operatorlarynyň arasynda Hazar deňziniň düýbi boýunça optika süýümli aragatnaşygy döretmek boýunça işler alnyp barylýar” – diýip, “Türkmenaragatnaşyk” agentliginiň başlygy belledi.
Ol soňky üç ýylda satyn alnan halkara internet kanallarynyň umumy kuwwatynyň on esse artandygyny hem sözüniň üstüne goşdy.
