Aşgabatda “Sanly çözgüt – 2023” bäsleşiginiň saýlama tapgyry tamamlandy. Bu barada Türkmenistan Halkara Habarlar portaly habar berýär.
Her ýyl “Türkmenaragatnaşyk” agentligi tarapyndan geçirilýän bu bäsleşik ýaş zehinli programma üpjünçiligini işläp düzüjileri we oýlap tapyjylary ýüze çykarmagy we goldamagy, şeýle-de ýurduň önümçilik pudagyna täze innowasion ideýalary girizmegi maksat edinýär.
Bäsleşigiň bu tapgyrynda mekdep okuwçylaryndan we talyplardan 320-den gowrak arza tabşyryldy. Gatnaşyjylar saglygy goraýyş, ylym we bilim, ulag we logistika, elektron senagat, oba hojalygy, hyzmat ulgamy we robototehnika ýaly ýedi dürli ugurda öz taslamalaryny görkezmäge mümkinçilik gazandylar.
Hödürlenen taslamalara ýurduň dürli pudagyndan hünärmenler baha berdi. Baha berlende, esasan, sosial-ykdysady prosesleri aňsatlaşdyrmak, ulanyjy interfeýsleriniň amatlylygy, özboluşlylyk, elýeterlilik, hil we dizaýn görkezijileri göz öňünde tutuldy.
Bäsleşigiň ýeňijileriniň 9 – 10-njy noýabrda Aşgabatda geçiriljek “TurkmenTEL – 2023” halkara sergisiniň we ylmy maslahatynyň çäklerinde yglan edilmegine garaşylýar. Bu çäre giň köpçülige innowasion işläp taýýarlamalary hem-de maglumat tehnologiýalary we aragatnaşyk pudagynda gazanylan üstünlikleri hödürlär.
