Meta kompaniýasy Facebook we Instagram sosial ulgamlaryny ulanyjylary öz maglumatlaryny has köp dolandyrmaga we mahabat görmezlige mümkinçilik berýän tölegli abunany resmi taýdan hödürledi. Birinji tapgyrda Ýewropa Bileleşiginde, Ýewropa ykdysady zolagynda we Şweýsariýada Facebook-yň we Instagram-yň ulanyjylary ýaşyrynlygyny goramak we mahabaty öçürmek üçin töleg töläp bilerler.
Brauzer arkaly tölense, abuna aýda 9,99 ýewro, iOS we Android programmalary arkaly satyn alynsa, aýda 12,99 ýewro. Abuna ýazylmaklyk birbada iki sosial ulgamda mahabaty öçürýär. Metbugat gullugynda şeýle belleýärler:
«Adamlar abuna ýazylsa, maglumatlary mahabat üçin ulanylmaz».
2024-nji ýylyň 1-nji martyna çenli abuna şol bir ulanyja degişli ähli Facebook we Instagram hasaplaryny öz içine alar. 1-nji martdan soň her goşmaça baglanyşyk hasabyndaky mahabatsyz amal, töleg usulyňyza baglylykda, aýda goşmaça 6 ýewro ýa-da 8 ýewro çykdajy talap eder.
Tölegli abunany 18 ýaşdaky we ondan uly ulanyjylar satyn alyp bilerler. Gowy habar hem bar, Meta abuna ýazylyşygyň başlamagy bilen 18 ýaşdan kiçi ulanyjylar üçin mahabaty “duruzjakdygyny” mälim etdi.
