Ýaş türkmen küştçüleri 15-nji oktýabrdan 26-njy oktýabr aralygynda Müsüriň Şarm-el-Şeýh şäherinde geçirilen 8, 10 we 12 ýaşa çenli küştçüleriň arasynda dünýä çempionatynda üstünlikli çykyş edip, öz halkara reýtinglerini ýokarlandyrdylar.
Rauf Ýusupow (häzirki FIDE reýtingi – 1500) 12 ýaşa çenli oglanlaryň arasynda geçirilen ýaryşda çykyş edip, mümkin bolan 11 utukdan 6,5 utuk gazandy we öz FIDE reýtingini 195 punkt ýokarlandyrdy. Ol ýaryşyň dowamynda Çehiýadan, Wengriýadan, Angliýadan, Bolgariýadan we Meksikadan güýçli bäsdeşlerini utmagy başardy.
12 ýaşa çenli gyzlaryň arasynda geçirilen ýaryşda çykyş eden Nebahat Myradowa (1194) 5,5 utuk gazanyp, öz reýtingini 150 punkt ýokarlandyrdy. Ol ýaryşda Gazagystandan ýaryşyň bürünç baýrakçysy Aiaura Altynbekden utuldy, ýöne Wengriýadan, Russiýadan, Finlýandiýadan we Gazagystandan gelen bäsdeşlerden üstün çykdy.
Şeýle-de, Perwana Serdarowa 6 utuk gazanyp, öz reýtingini 40 punkt ýokarlandyrdy. Perwana 12 ýaşa çenli türgenleriň arasynda Angliýanyň çempiony Saharkar Şarwarini, şeýle-de germaniýaly we wengriýaly garşydaşlaryny utdy.
Türkmen küştçüleriniň arasynda Maksat Öwlüýägulyýew has gowy netije görkezdi. Ol 8 ýaşa çenli oglanlaryň arasynda geçirilen ýaryşda çykyş edip, 7 utuk gazandy we 80 gatnaşyjynyň arasynda ýaryşyň ilkinji ýigrimiligine girdi (19-njy orun).
Ýaryşyň jemi boýunça “Dünýä çempiony” adyna Russiýadan Roman Şogjiýew, Gazagystandan Danis Kuandykuly, Wýetnamdan Dau Huong Duý, Angliýadan Bodana Siwanandan, Hytaýdan Szue Tianhao, Şri-Lankadan Gunawardhana Dewindýa Oşini mynasyp boldy. Ýaryşa 67 ýurtdan 600-e golaý türgen gatnaşdy.
Türkmen küştçüleriniň noýabr aýynda Italiýanyň Montesilwano şäherinde geçiriljek 14, 16 we 18 ýaşa çenli oglanlaryň we gyzlaryň arasynda dünýä çempionatyna gatnaşmagyna garaşylýar.
