23-nji oktýabrdan 25-nji oktýabr aralygynda Aşgabatda mekdep mugallymlary üçin bilim robototehnikasy boýunça seminar geçirildi. Oňa 27 hünärmen gatnaşdy we olar treningiň dowamynda mekdep sapaklarynda bilim robototehnikasyny ulanmak üçin zerur bilimleri, başarnyklary aldylar.
Seminar ÝUNISEF tarapyndan Türkmenistanyň Bilim ministrligi bilen hyzmatdaşlykda geçirildi. Onuň dowamynda mugallymlar robototehnikanyň we Scratch programmirleme diliniň esaslary, programmirlemäni we robototehnikany öwretmek üçin Arduino esasy toplumlarynyň komponentleri bilen tanyşdylar, ussatlaryň sapaklaryna gatnaşdylar we bu platformanyň kömegi bilen öz başarnyklaryny ulanyp bildiler.
Seminara gatnaşyjylar Türkmenistanda STEM dersleriniň okadylmagyny we gyzlaryň bu ugurda gatnaşygyny giňeltmek üçin okuwlaryň dowam etdirilmegine gyzyklanma bildirdiler.
Bu seminar Türkmenistanda bilim standartlaryny berkitmek we okuwçylary geljekdäki kynçylyklara taýýarlamak boýunça işleriň bir bölegidir. Bilim robototehnikasynyň bilime girizilmegi diňe bir onuň hilini ýokarlandyrman, eýsem çagalarda innowasion pikirlenişi höweslendirer, olary oýlap tapyşlara ruhlandyrar.
