“Köňül tary” atly täze biografiki sepktakl meşhur türkmen kompozitory Nury Halmämmedowyň ömri we döredijiligi barada gürrüň berer diýip, “Türkmenistan: Altyn asyr” habar berýär.
Türkmenistanyň halk artisti, SSSR-iň Döwlet baýragynyň, Magtymguly adyndaky Türkmenistanyň Döwlet baýragynyň eýesi Nury Halmämmedow türkmen nusgawy aýdym-saz sungatynyň ösüşine uly goşant goşdy. Onuň gymmatly aýdym-saz mirasy bütin dünýä boýunça diňleýjileri haýran galdyrmagy we ruhlandyrmagy dowam etdirýär.
Türkmenistanyň at gazanan sungat işgäri Bilbil Mämmedow ussat kompozitoryň ýubileýiniň öňüsyrasynda Alp Arslan adyndaky Milli drama teatrynyň topary bilen türkmen kompozitorynyň döredijiligine hormat goýujylar üçin “Köňül tary” atly täze sahna oýnuny goýmak kararyna geldi. Režissýor öňem A.S.Puşkin adyndaky Döwlet rus drama teatrynyň sahnasynda Mämmetgurban Mämmetgurbanow bilen Söhbet Serbazowyň adybir pýesasyny sahnalaşdyrypdy.
Bellenilen täze spektaklda görnükli artistler çykyş eder: şahyr Gurbannazar Ezizowyň keşbini Süleýman Eminow, aýdymçy Atageldi Garýagdyýewiň keşbini Şirgeldi Saparow, Nury Halmämmedowyň keşbini bolsa Perhat Sallandyýew ýerine ýetirer.
Režissýoryň belleýşi ýaly, spektaklda kompozitoryň meşhur aýdym-saz eserleri ýaňlanar. Täze sahnalaşdyrma käbir stilistik usullar, paýhasly jümleler we türkmen nakyllary bilen tapawutlanýar.
Spektaklyň premýerasy 28-nji we 29-njy oktýabrda bolar. Ol Nury Halmämmedowyň doglan gününiň 85 ýyllygyna bagyşlanan “Mukama siňen ömür” atly festiwalyň çäklerinde geçiriler.
