Nauşnikde uzak wagtlap we hemişe aýdym diňlemek eşidişe zeper ýetirip, gulak bilen bagly näsazlyklara getirip biler. “Inwitro” lukmançylyk kompaniýasynyň hünärmenleri munuň gulakda gut dykysynyň emele gelmegine getirip, infeksiýa töwekgelçiligini ýokarlandyryp biljekdigini-de anykladylar diýip, ferra.ru belleýär.
NHANES amerikan programmasynyň çäklerinde geçirilen gözleg işleri nauşnikleriň eşidişe ýaramaz täsir edip biljekdigini tassyklaýar. Bu gözleg anketalaşdyrmany we audiometrik barlaglary öz içine alyp, yzygiderli nauşnik ulanýan 20 ýaşdan 69 ýaş aralygyndaky 3583 gatnaşyjyny özüne çekdi.
Netijeler nauşnik ulanylanda erkek adamlaryň eşidiş näsazlyklaryna köp duçar bolýandygyny we bu töwekgelçiligiň ýaşyň ulalmagy bilen ýokarlanýandygyny görkezdi. Bütindünýä saglygy goraýyş guramasynyň (BSGG) görkezmelerine laýyklykda, hünärmenler aýdym-sazyň güýçlülik derejesini 85 desibelden geçirmezligi we şeýle güýçlülik derejesinde aýdym-sazy günde 60-80 minutdan köp diňlemezligi maslahat berýärler. Şeýle-de, olar gut dykysyndan we infeksiýadan gaça durmak üçin nauşnikleri arassa saklamagyň möhümdigini belleýärler.
