Brýusselde Merkezi Aziýanyň zenan liderleriniň Dialogyna gatnaşyjylaryň saparyna garaşylýar. Indiki aýa, 13 – 15-nji noýabra meýilleşdirilen duşuşyk Aşgabatda ýerleşýän MA üçin Öňüni alyş diplomatiýasy boýunça sebit merkezi we ÝB-niň Merkezi Aziýa boýunça ýörite wekili tarapyndan bilelikde guralýar diýip, Orient habar berýär.
Çäräniň maksady “Zenanlar, parahatçylyk we howpsuzlyk” atly global gün tertibini durmuşa geçirmekde ÝB-niň edaralary bilen tejribe alyşmakdyr.
Bu tema 23-nji oktýabrda Lýuksemburgda geçirilen Merkezi Aziýanyň we Ýewropa Bileleşiginiň ýurtlarynyň Daşary işler ministrleriniň 19-njy duşuşygynda gozgalyp geçildi. Gatnaşyjylar zenanlaryň çözgüt kabul etmekde doly we deň derejeli gatnaşygyna mundan beýläk-de ýardam etmegiň zerurdygyny bellediler we bu ministrleriň bilelikdäki beýannamasynda berkidildi.
MA-nyň zenan liderleriniň Dialogy BMG-niň Öňüni alyş diplomatiýasy boýunça sebit merkeziniň we BMG-niň Ösüş maksatnamasynyň ýardam etmeginde 2020-nji ýylyň dekabr aýynda resmi işe girizildi. Ol zenanlaryň syýasy, ykdysady we jemgyýetçilik durmuşyna gatnaşygyny ýokarlandyrmak üçin meýdança hökmünde döredildi.
