«Citroen» «C3» hetçbekiniň täze, dördünji neslini hödürledi. Bu barada kompaniýanyň metbugat gullugy habar berýär.
Dördünji nesil «C3» «CMP» modul platformasynda guruldy. Awtoulagyň uzynlygy 4000 mm, teker binýady 2540 mm. Goş goýulýan bölüm 310 litre çenli ulaldyldy. Şeýle hem kompaniýa salonyň has giňeldilendigini aýtdy. Öňdäki panel indi üç derejeden ybarat. Merkezi displeýiň diagonaly 10,5 dýuýma deň. Transmissiýa režiminiň selektory rul sütüninde däl-de, merkezi tonnelde ýerleşýär.
Ýewropa bazaryna ilkinji bolup «Citroen e-C3» elektrikli nusgasy çykarylar. Onuň kuwwaty 113 at güýji bolar. Awtoulag 11 sekuntda 100 km/sag tizlige ýetmegi başarar we iň ýokary tizligi sagatda 135 km bolar. Bir zarýadda geçjek aralygy – 320 km. 2025-nji ýylda onuň has kiçi batareýa bilen üpjün edilen we geçjek aralygy 200 km-den köp bolmadyk has ýönekeý nusgasy hem dörediler. Mundan başga-da, 1,2 litrlik hereketlendirijisi we 100 at güýji kuwwaty bolan iki sany benzin bilen işleýän nusgalary hem çykar. Täze önümiň satuwy 2024-nji ýylyň ikinji ýarymynda başlar.
