Germaniýanyň Bayerische Motoren Werke AG (BMW Group) awtoöndürijisi 2024-nji ýylda awtomobilleri ýewropaly sarp edijilere göni satyp başlamagy meýilleşdirýär diýlip, kompaniýanyň metbugat relizinde aýdylýar. Muny interfax.ru ýetirýär.
1-nji ýanwardan başlap täze satuw modeli Italiýada, Polşada we Şwesiýada Mini markasyna degişlilikde hereket edip başlar. Soňra bu kem-kemden Ýewropanyň beýleki ýerlerine-de ýaýrar, BMW-niň özüniň bu modele 2026-njy ýyldan geçmegine garaşylýar.
Ähli täze BMW we Mini awtomobilleri, şeýle-de BMW Group-yň tas täze awtomobilleri agentlik modeli arkaly satylar diýip, kompaniýa belleýär. Riteýlerler alyjylar üçin aragatnaşyk nokady bolup galar we her bir satylan awtoulag üçin belli bir komissiýa alar.
“Täze satuw modeli alyjylar, ownuk söwda hyzmatdaşlary we BMW Group üçin bähbitli bolar. Bir ýurduň çäginde birmeňzeş awtomobil modelleri üçin standart bahalar alyjylar üçin baha durnuklylygyny üpjün eder. Mundan başga-da, agentlik modeline geçilmegi bilen BMW Group ähli prosesi sanlylaşdyryp, alyjylara onlaýn we oflaýn satuwyň arasynda saýlamak, şeýle-de bu iki kanalyň arasynda akgynly geçiş mümkinçiligini hödürlär” – diýlip, metbugat relizinde aýdylýar.
Sarp edijilere göni satuw modelini Tesla amerikan kompaniýasy hem ulanýar.
