Türkestanda (Gazagystan) geçirilen Türki döwletleriň guramasynyň syýahatçylyk ministrleriniň sekizinji duşuşygynda Türkestany 2024-nji ýyl üçin türki dünýäsiniň syýahatçylyk paýtagty hökmünde saýlamak kararyna gelindi. Bu barada 3-nji noýabrda şu şäherde geçiriljek TDG ýurtlarynyň ýolbaşçylarynyň sammitinde resmi taýdan yglan etmek meýilleşdirilýär.
Syýahatçylyk ministrleriniň duşuşygynyň yzyndan, 12-nji oktýabrda Türkestanda türki ýurtlaryň wekilleriniň arasynda syýahatçylyk foumy geçirildi. Forumyň esasy maksady özara bähbitli hyzmatdaşlygy ýola goýmakdan we 2024-nji ýylda türki dünýäsiniň indiki paýtagty hökmünde Türkestan şäheri bilen tanyşmakdan ybarat boldy.
Forumda gazak tarapy TDG-niň agza döwletleriniň we synçy döwletleriniň arasyndaky howa gatnawlarynyň sanyny artdyrmak, bilelikdäki syýahatçylyk önümlerini döretmek, hyzmatdaşlyk gatnaşyklaryny ýola goýmak boýunça işleri işjeňleşdirmek we häzirkizaman “Ýüpek ýoly” ugruny ösdürmek ýaly birnäçe başlangyçlary we toplumlaýyn çäreleri hödürledi.
Belläp geçsek, häzirki wagtda türki dünýäsiniň syýahatçylyk paýtagty adyny Azerbaýjanyň Şemahy şäheri göterýär. Azerbaýjanyň Döwlet syýahatçylyk agentliginiň başlygynyň geňeşçisi Kýanan Guluzadeniň aýtmagyna görä, 2023-nji ýylyň 9 aýynda Gazagystandan, Özbegistandan, Türkiýeden, Wengriýadan, Gyrgyzystandan, Türkmenistandan Azerbaýjana baryp görenleriň sany, degişlilikde, 32, 59, 20, 91, 78 we 188 göterim artdy.
