Nemes awtoulag öndürijisi «BMW» «X2» kross-kupesiniň ikinji neslini tanyşdyrdy. Täze ulagyň dünýä bazarlaryndaky satuwy 2024-nji ýylyň mart aýynda başlar. Bu barada kompaniýanyň metbugat gullugy habar berýär.
Birinji nesil awtoulag bilen deňeşdirilende, täze ulag, takmynan, 200 mm uzyndyr, onuň teker bazasy hem 230 mm ulaldy. Maşynyň üçeginiň arka tarapy has egri edildi, bu bolsa ony hasam kupe meňzedýär. Bu modeliň aerodinamiki garşylyk koeffisiýenti 0,25-e deňdir.
Onuň salonynda 10,7 dýuýmlyk egri displeý we original grafikasy bolan 10,25 dýuýmlyk sanly gurallar paneli ýerleşdirilipdir. Panorama üçegi mümkinçiligi hem elýeterlidir. Awtoulag media ulgamyna we awtoulagyň işleýşine gözegçilik etmek üçin dokuzynjy nesil «iDrive» ulgamy bilen üpjün edildi.
Ýewropada 170 at güýji kuwwaty bolan 1,5 litrlik benzin hereketlendirijisi bolan adaty nusga satylar. Iň kuwwatly nusgasy bolsa 300 at güýjüni öndürýän iki litrlik hereketlendirijä eýe bolar. Mundan başga-da, ýewropalylara 150 at güýji bolan dizel hereketlendirijili nusga hödürlener. Ähli wersiýalar hem ýedi basgançakly robotizirlenen geçiriş korobkasy bilen üpjün ediler.
Şeýle hem umumy kuwwaty 313 at güýji bolan iki sany elektrik hereketlendirijisi (her okda biri) bilen enjamlaşdyrylan «BMW iX2» elektrikli görnüşi hem hödürlenýär. Onuň hereket ätiýaçlygy 450 km-dir. 0-dan 100 km/sag tizlige 5,6 sekuntda çykýar.
